Kembang Rinonce

Aruming kembang mlathi rinonce

Kaseselan endahing abang mawar kang wangi gandane

Katutup putihing lancip kembang kanthil

Wangi sumebyar

Kembang mawar, mlathi, kanthil

Lamun linawar tembung manis ing lathi gumanthil jroning nala

Semribit aruming kembang kagawa angin

Arum gandane sumerbak

Kembang rinonce cumanthel gagang keris

Mugi tansah anjaga keris nora metu saka warangkane

Anjaga dhiri saka polah angkara ing bebrayan

Ora nalingisir marang tindak kautaman

Kembang rinonce ngalungi jangga timekaning dhadha

Anjaga ati saka godha njaba mrih tentram ing bebrayan

Supaya adhem ayem lan wicaksana anggone mulat salira

Sansaya endah lan arum rikma mring mustakanira

Kembang rinonce

Tansah kumanthil ana ati

Kang endah menawa dilambari kanthi ikhlas

Urip bebrayan, nyawiji dadi siji

Wangining kembang rinonce

Minangka dadi pratanda

Dhodhog kori pinajang nginang jambe suruhe

Ngrakit sekar cempaka mulya sasele